如果你係阿仙奴鐵粉，相信都會認同亨利當年為廠迷帶來無數嘅歡愉；呢位「國王」喺球圈吃得開，收山講波人工勝過大部分現役英超球員，戰術分析，尤其講進攻老本行又獨到。人到中年，仍然瀟灑，先匿喺威爾斯深造攞正教練牌，再做比利時助教當跳板。呢次選擇重返母會法甲摩納哥，接掌帥印救亡，成功機會唔細。踢波叻當然唔一定教波叻，不過亨利喺球圈無論做乜嘢角色，都有未去到盡，或者唔想做大哥搶盡風頭嘅感覺。喺阿仙奴2003至04年不敗神話中，亨利有皮利斯、柏金、韋拉同龍格保等猛將並肩，喺法國國家隊連奪98年世界盃同2000年嘅歐國盃，又有施丹壓陣；去到巴塞隆拿，又有美斯。英超講波見到前輩行家，唔敢太搶鏡；教波初體驗當然縮喺比利時主帥馬天尼斯後面。今次咁啱等到近年散貨散出禍來嘅摩納哥易帥，亨利終當大主角。喺法甲，巴黎聖日耳門獨大，其他多庸碌無為，以摩納哥嘅班底要強力反彈，年底前重返前列唔難。