倫敦是...紅白定藍？

倫敦球會一向係英超大戶，呢幾年失威，阿仙奴上屆臨尾腳軟，先係近6屆首支能打入英超頭兩名嘅倫敦球會。今屆同樣7路興兵，首輪英超連埋倫敦打吡熱刺同賓福特未分高下，倫敦球會錄得4勝3和不敗，爭霸、黑馬皆有，呢股反彈力量醞釀爆發。

倫敦一哥，紅方阿仙奴、白方熱刺同藍方車路士，近年互有勝負，London is Red呢一年俾阿迷唱到行，小兵勇熟；不過始終「白藍」兩軍唔使踢歐洲賽，大利谷底博反彈，其中成隊波執過嘅車仔，首輪鬥利記冇期望但有驚喜，「新核」安素費南迪斯勁到爆；要不是單箭頭尼高拉斯積臣較粗糙，贏埋唔奇。車仔新軍上望空間變大，最新奇係佢哋嘅吸星能力，不斷用超長約利誘對方加盟，截紅軍胡搶到摩西斯卡斯度，組成英超最強「鑽石雙核」；加埋車仔首場表現，相信足以震攝英超列強。卡尼走後嘅熱刺亦唔會甘心就範、唔會慳住荷包當李察利臣係新卡尼，「紅白藍」差距收窄有排鬥，億億聲嘅大刁，開咗季相信陸續有來！