夏蘭特開季已攻入6球，不太受迪布尼缺陣影響。（路透社）
英超踢過4輪，除曼城唔使休養中嘅哥帥現身，一樣全勝居首，而3支升班馬夾埋踢咗10場不勝唔意外，整體觀感比以往更精彩。爭霸大局，言之尚早，藍月10月就會先後喺英超鬥阿仙奴、白禮頓同曼聯；到時哥帥嘅新陣、新兵先嚟料、坦克嘅紅魔新軍先見真章，今個國際賽期空檔後，英超先叫真開季。
英超好睇，入波多係主因，由1992/93年成立開始計起，平均每場入波係2.67球；但對上兩季全季平均入球數字，其實已升至2.82球及上季嘅2.85球，今屆打咗39場，更急升至每場3.26球。配合「補時要足」呢個英超新規條，90分鐘比賽劃分每15分鐘一個時段，最後15分鐘(即76-90分鐘連補時)，入球數目高佔26%，上、下半場入波分布接近「四六之比」；球隊多以後勁搶分，賽事又點會唔精彩。當大家以為阿仙奴今屆又係暫時嘅後勁王、絕殺王；其實最勁暫時係全英超最老波士鶴臣教嘅水晶宮，今屆入嘅5球全部下半場取得並貢獻全數7分，咁平實嘅班底仲有唔錯嘅成績同娛樂性，老鶴值得獲頒個季初之星獎！