今晚上演西班牙超級盃次回合，由皇馬返回主場再戰巴塞。首回合皇馬作客魯營以3比1擊敗巴塞，C朗拿度後備上陣有士哥，但兩黃一紅被逐兼推撞球證，賽後被足總追加合共停賽5場，缺少C朗之下，睇下巴塞有冇可能收復失地！皇馬喺季前熱身賽表現一般，自從C朗歸隊之後，演出明顯有改善，今仗缺少呢位重心人物，攻力難免打咗折扣。巴塞季前熱身賽成績唔錯，5戰取得4勝1和不敗，尼馬轉投巴黎聖日耳門後，前線攻力或多或少受影響，而且美斯同蘇亞雷斯狀態仍未十足。對賽方面，巴塞近6次到訪班拿貝，錄得3勝1和2負略為佔優，論形勢今仗佢哋會較積極，預料可坐和望贏，但兩回合加埋要反勝就比較難喇。