曼聯宣布以4,000萬英鎊收購車路士防中尼曼查馬迪，合約為期3年，佢將穿上31號球衣。摩連奴對馬迪可算係情有獨鍾，2014年重掌車仔後，以2,100萬鎊由賓菲加購回馬迪，如今又動用4000萬鎊將佢收歸旗下。無可否認，馬迪近年喺車仔有不俗表現，上季同尼高路簡迪踢雙防中，瓦解對手唔少攻勢，協助車仔重奪英超冠軍。不過，個人認為今次轉會費略嫌過高，事關馬迪昨日已踏入29歲，以佢歲數都要呢個價錢，的確唔太划算，而且呢位塞爾維亞國腳實力已見底，未必有進步空間，踢多兩、三季後將佢賣走又唔值錢。不過，現今好多教頭都唔會諗得咁長遠，最緊要呢一刻幫到手，將來嘅事，將來先算啦。