英超戰畢首輪，曼城擁有強大新星中鋒，進階至超強2.0版。相反其鄰會曼聯迎戰季前流失兩大主將嘅白禮頓，攻守失據；箭頭福仔依然冇厘神氣、中場用般奴費南迪斯同加盟不久嘅「子弟兵」基斯甸艾歷臣打「雙核」，中場掌控能力唔見勁咗，默契未建立。季前要求離隊嘅C朗唔盡快表明心跡，出場扮唔到救世主。場上另一大問題係5呎7吋「自己友」中堅利辛度馬天尼斯，同隊長馬古尼好似雞同鴨講，走位混亂，多次走甩同頂輸只係一個前曼聯老中鋒韋碧克，下場會唔會出返華拉尼拍馬古尼好啲。坦帥最後亦係最大敗筆，補時先一口氣換3個年輕人入嚟，其中左閘拉馬西亞喺後防不知所措，季前所謂重用年輕球員，好似出場孭鑊。
紅魔下場作客「蜜蜂兵團」賓福特，之後返主場鬥利物浦；賓福特首輪落後2球都追得和主場嘅李城，領隊法蘭克下半場調動果敢，早換齊5人添前線活力係搶返1分嘅關鍵，曼聯依然固我，小心俾完「海鷗」(白禮頓)啄，又俾「蜜蜂」針！
