意軍恐怕又出事

一節淡三墟，睇完至激英超，各地聯賽又要停兩星期，讓路國際賽；強隊至怕主力負傷回歸，不過好以巴西巨星尼馬上月幫巴西踢太公波重創，對於巴西要喺10支南美隊有機會最多出7隊嘅無謂外圍賽打滾，無乜影響；對於俾緊250萬英鎊周薪人工佢嘅沙特球會希拉爾，濕濕碎之餘，隊內歐洲球星雲集，聯賽仲領先緊C朗嗰隊4分，實力無損。

除咗國際賽主打嘅世盃南美外無謂，歐國外打到尾一樣冇乜吸引力，加埋主辦國德國共24隊出線，強弱隊都有逃生門，要死都難。唯獨缺席去年世盃嘅意大利，又成焦點。藍軍如無意外喺下周一深夜會喺德國中立場，同烏克蘭決生死爭次名出線，許和不許敗，壓力唔細。隊波今次選入3個英超兵，其餘全是意甲「精兵」；但選番阿仙奴老將佐真奴替停賽東拿利嗰防中位置，再從歐聯戰績睇米蘭雙雄已跌watt、衛冕聯賽嘅拿玻里又冧檔，暫時最勁嘅意甲土炮射手係新入選嘅蒙沙前鋒哥柏尼，但12場聯賽入得6球。藍軍實力今非昔比，前線卡士唔足，生死關頭，恐怕出事。