掘車仔3大寶藏
上屆錄得該會英超史上最差嘅車路士，今個暑假要瘋狂「減磅」，騰出空間俾新波士普捷天奴組裝新「車」；唔少隊內嘅揀手好貨，將會陸續流出市場，睇下邊個識掘呢個寶藏。車路士近年管治混亂，買賣好易睇錯，睇返佢哋上屆夏天放走嘅主要球員，前鋒迪姆華拿、中場比利基莫亞，同唔肯續約去咗西甲嘅中堅魯迪格同安達斯基斯坦臣，去到其他球會都冇跌watt，證明跟本身實力無關。傷嘅尼高路簡迪、盛年漸過嘅高華錫、毫無鬥心嘅奧巴美揚、踢得唔開心嘅薛耶治同「非我族類」嘅古古列拿、羅夫度斯卓克，今夏要走可以理解；但幾位24歲好手都想善價而沽，有機會益到下家。
好似之前踢國家隊友賽入2粒嘅「美國隊長」基斯甸普列錫、英格蘭中場主力美臣蒙特，踢慣英超又當打。最神奇應該係2021年該隊歐聯入波功臣嘅夏維斯都肯割愛，呢位德國隊猛將可踢中前場幾個位置，身價大約5,000至7,000萬英鎊；阿仙奴達Sir上屆執幾件大會失意兵都識用，難怪見獵心喜，買入風險其實比未踢過大會都要1億英鎊嘅中場迪格蘭賴斯細。
