世盃決賽周走近，但要踢歐洲賽嘅英超隊，仲要踢多4場聯賽、2場歐洲賽同1場英聯盃，踢死罷就；為球會利益兼保住份工，領隊多數唔會錫住球員。阿迪達講明要成為頂級球星，一季踢70場當閒事，自我催眠夢想遠大；當然小「兵」多、後生仔回氣快，只見阿仙奴有疲態稍為跌watt，但冇重要傷兵，呢點係爭霸最有利條件；但熱刺領隊干地唔興輪換，傷咗兩個前鋒，搞到哈利卡尼同孫興民完全冇得休息，場場硬仗越踢越頹，事出必有因。最擔心會係英格蘭主帥修夫基同南韓教練保羅賓度，日日祈求呢兩位國家隊王牌箭頭，下月平安報到。
送走謝拉特的維拉，下月將由現執教西甲維拉利爾的艾馬利掌帥印。
打得密，原來先係換領隊嘅黃金時間，單係呢個月，英冠換咗6個領隊。英超現時同期竟然有3個替工阿頭，你話成隊英冠班底嘅般尼茅夫冇人吼，合情合理；但今夏使咗過億英鎊，成隊葡軍嘅狼隊，都要搵個U18阿頭頂到下年，先至奇怪。再睇下維拉踢走謝拉特兩、三天，隊波極速變勁，排陣亂晒龍嘅列斯聯領隊馬殊，過唔過到世盃開波前呢？