今夏歐洲轉會市場由英超激活，單係淨買入轉會費逾30億英鎊；連以往變動少嘅門將位置亦唔能夠倖免，連同意大利鋼門當拿隆馬空降曼城，預計本周末重開嘅英超，20隊中會有8隊係由今夏「新龍」把關，包括曼城雙雄齊「易龍」。奧拿拿告別紅魔借去土超，腳法一般嘅當拿隆馬呢位2021年歐國盃決賽嘅「三獅剋星」，即變英超龍門界嘅新焦點。
英超花得起，但計門將人工一環，原本最貴嘅達米安馬天尼斯同艾利臣比加，都唔入世界前五位，比人工第一位嘅拜仁嘅紐亞少一半。當拿隆馬俾PSG踢走，估唔到落腳地係出得起更高人工嘅曼城；都要多得藍月另一重金回歸門將查福特季初騰雞，當拿隆馬唔使去沙地或土超落腳。曼城國際賽前英超連敗，唔只要賴門將，後迪布尼時代、加上菲爾科頓進度停滯，大軍進攻質素比起之前哥帥領軍六奪英超，明顯遜色，重奪霸業困難重重。當拿隆馬首演好大機會係周日曼市打吡，面對2億英鎊嘅紅魔新鋒線，值唔值25萬英鎊周薪，好快揭盅。