柱躉中鋒再度抬頭
曾經風靡一時嘅「冇鋒陣」，隨住英超唔少實力分子購入高大、柱躉型中鋒享受緊愉快經驗，可能已漸成過去式；唔止要跟住歐洲風走，仲要跟住哥迪奧拿、高普呢啲英超名帥走，失敗機會都會細啲。先講今屆歐聯8強，擁有柱躉中鋒艾寧夏蘭特、賓施馬、域陀奧森漢、基奧特同盧卡古嘅球隊，多數係爭霸要角；但冇嘅好似賓菲加、車路士同拜仁全部喺首回合落後緊2至3球，其中冇咗「羅拔仔」嘅拜仁，上周首回合搵基拿比打無鋒陣，一敗塗地。車仔今屆買咗十幾廿人都冇個係正箭頭，波都唔識入，美國班主應炒晒買人班團隊。中鋒老嫩已證明唔緊要，唔可以全場奔跑亦唔係重點，最緊要係天生射手，少傷病履歷就啱用。
再睇冇踢歐聯嘅英超實力分子，曼聯、紐卡素同16強出局嘅熱刺，如今都有柱躉中鋒爭佳績，所以未夠30歲嘅卡尼仲咁值錢，歐洲大會搶人有因。阿仙奴達sir抄足曼城，但今屆就係冇一個正中鋒，下屆起碼踢返歐聯，到時唔止要兩隊精兵，前線欠高度，一味死搓入去，因住兩頭唔同岸。