奧巴美揚事隔多年再度回歸法甲
C朗、美斯各有好歸宿，輪到基利安麥巴比成焦點，前途未明；不過後生當打，錢途無限，反而法甲最新評為歐洲「7哥」，若PSG提早失去呢位未來GOAT(Greatest of All Time)接班人，想攞歐聯冠軍更無望，法甲地位更跌，如今唯有靠過氣GOAT、前非洲足球先生奧巴美「揚」，回歸沖喜一下。
依家英超出幾十萬英鎊周薪招人當閒事，但焦點喺當打有轉售能力嘅後生仔，好似曼聯可出到40萬英鎊續約福仔，但唔肯同減人工嘅「金手套」迪基亞續約。回想唔夠3年前，奧巴美揚31歲仲可以𢱑到阿仙奴同佢續約3年，狂加到35萬英鎊周薪；球會當年仲出動名宿伊恩胡禮喺酋長球場，一對一訪問，勁褒佢係亨利「14號」接班人，必躋身GOAT之列。事後孔明，跌晒眼鏡，「美羊」走樣射極唔入，慶幸達Sir分手夠狠，將球會痛楚減輕。呢隻「羊」近年變成人球，但好命水總有落腳地方，啱啱返到成名地、母語嘅法國，投靠法甲季軍馬賽。同佢同齡嘅前阿仙奴翼鋒阿歷斯山齊士，上屆喺法甲入到12球，呢對「老孖寶」雙劍合璧；加上球會新帥上場有圖強決心，「阿揚」肯攞返啲鬥心出嚟，踢法甲、踢歐聯外夠殺啩。