近年英超情傾葡超兵，又勝在多交到貨，只見壟斷葡超王座逾廿載嘅波圖、賓菲加同士砵亭，近年喺歐洲賽賽績一啲都唔標青，但神奇地持續賣人賺大錢。計埋阿仙奴接近傾成波圖新星法比奧韋拉，將會係近5年第16位加入英超嘅葡超兵，勢頭好似廿多年前阿仙奴傳奇領隊雲格，持續引入法國或者法甲兵，壓倒曼聯一樣，其他球會自然跟風。葡超兵從早年哥迪奧拿引入賓菲加嘅巴西門將艾達臣摩拉斯、到狼隊因跟葡超淵源甚深，一升班頭兩季都攞第7；繼後曼聯簽攻中般奴費南迪斯、曼城購中堅魯賓戴亞斯及今年初利記買路爾斯戴亞斯，價錢唔係頂級但大獲好評，所以紅軍今夏再購更貴嘅賓菲加前鋒達雲紐尼斯，外界暫評甚至指比曼城簽多傷患的德甲箭頭艾寧夏寧特嘅風險更細。不過要留意，睇數據歷史葡超兵最啱即食，反而狼隊對上一個3,500萬英鎊來自波圖嘅小將法比奧施華，上屆常踢但一球不入；如今未踢過葡國大國腳嘅「新韋拉」以相約價錢去阿仙奴，又睇下阿迪達有冇雲格嘅眼光。
