韋拉高危
英超踢咗約三分二賽程，護級嘅激烈程度近年未見，現時第12位至20位差距收窄到只有5分，但其實當中好多隊都未有太大危機感；邊個最終跌入「地獄」英冠，緊湊及意外程度唔比「阿曼爭霸」遜色。
今屆中下游大混戰，主因以上嗰9隊全部英超勝率大約得廿多巴仙，3分制下不斷和波幫助唔大；尾三隊修咸頓、列斯聯同般尼茅夫近期搶分唔少，尤其修頓同般茅撼強隊攞到分，外界睇淡前景，反而有助減壓季尾放手一搏。相反，水晶宮、韋斯咸同李城呢支傳統球隊可能出事；其中李城成季識攻唔識守，反而有機會間中攞下3分保到命，但主帥羅渣士下屆再留隊機會唔大。韋斯咸淨係識喺歐協聯恰弱隊，唔專注又唔覺自己係弱隊先最麻煩。水晶宮屆屆夠分就收油，韋拉之前教法甲尼斯同現時水晶宮，都係悶蛋足球；隊波已經10場英超不勝，明晚作客白禮頓後周日鬥阿仙奴，要極力避免連敗，尤其返酋長球場倒戈，呢班小「兵」為爭霸上晒身唔會留手，分分鐘搞到呢位兵工廠名宿，提早截數等過復活節。
