北倫敦雙雄攬炒

究竟下屆仲有冇機會上演史上第200次北倫敦打吡由熱刺鬥阿仙奴？熱刺敗走新特蘭，終要跌落尾三降班區，餘下剩返6場波保住英超席位，貴為傳統Big Six今屆仲踢到歐聯，要跌落英冠匪夷所思，震撼可比10年前李城神奇封王英超，北倫敦打吡將來可能只有機會喺盃賽續演。喺另一邊敵對嘅阿仙奴亦都冇心情笑對手折墮，嚟緊兩場大戰包括明晚歐聯主場鬥士砵亭同周日英超天王山之戰作客曼城，將可見證「亞軍奴」魔咒係咪再度重臨，遭到全英球迷詛咒成真。輸到慌失失嘅北倫敦雙雄呢刻信心喺低點，只求一場大捷挽救今屆球季。

有調查顯示，八成多受訪嘅熱刺球迷，寧願球隊降班都唔想阿仙奴攞英超冠軍，攬炒心態濃烈。英超好睇只因均勢充滿悲喜，球迷各為其主想睇人閉翳令自己心情好過一啲，不難理解。利物浦上屆驚喜封王，今季大搞卻大跌；相反死敵紅魔悄悄回起，等候下季發難。10前嘅李城現時排緊英冠尾二，大有機會降落英甲，再落多一層地獄，熱刺球迷識驚嗎？