世盃下半場

擴大後世盃，最驚喜係72場分組賽場均入咗2.99球，暫時係近幾十年世盃嘅新高；小組第3球隊有份爭入淘汰賽，利多於弊，分組賽尾輪少咗例行公事或協議波，多咗仲有機會爭出線球隊，外界不斷同佢哋計分計得失球，關注度大增。雖然暫未見超新星彈出，但老球王美斯3場入6球，激起各強國一眾名牌射手唔爭執頻頻發炮，今屆好大機會突破近幾十年嘅世盃金靴獎得主最多入8球嘅紀錄。不過美斯係咪可以大熱勝出，要睇下阿根廷身處淘汰賽下線嘅一眾黑馬，嚟緊點樣死守困阿根廷。淘汰賽一樣走靚線嘅三獅，暫入3球、側擊同角球會得到無限支援嘅哈利卡尼，入球數字有機會追返上嚟。

唔知巧合定好彩，分組賽正路賽果造就各大洲好手喺淘汰賽線路上分布平均，對抗性增加。超級大戶歐洲去到16強先有機會4大強國「法德」同「雙牙」內訌；另一大戶非洲，隊隊體力雄渾，天氣越熱對佢更有利，32強淘決賽只有埃及鬥澳洲，非洲代表係熱門一方，先係今屆淘汰賽嘅爆冷溫床。