無綫新處境劇《愛．回家之三代同糖》開播一周，觀眾除咗攞之前播咗十年嘅《愛．回家之開心速遞》比較，新劇仲用咗唔少AI生成背景，被網民一面倒批評；另一邊廂，有人同時指出ViuTV新劇《日落下的彩虹》宣傳海報都用AI，但就被吹捧到係「港劇新希望」，質疑觀眾有雙重標準。
事實上，TVB上個月改名做「無綫集團」，取代用咗幾十年嘅「電視廣播有限公司」。明顯唔再只做電視咁簡單，近日仲同其他公司合作，計劃起AI數據中心，生產同出售算力。其實《愛．回家》之外，已有唔少節目加入好多AI生成部分，洪永城加黃翠如之前一個旅遊節目，都加入AI穿越情節。今次《三代同糖》棄用廠景，用AI生成背景，相信只係小試牛刀，未來一定會越用越多。
至於ViuTV，母公司本身就係電訊公司，科技同佢哋本來就密不可分。不過睇返佢哋嘅製作，《日落下的彩虹》海報確實有用AI，但套劇以真實場景，連搭景都幾乎冇，其他節目經常被形容係土砲。
今時今日，當幼稚園就要學AI，內地仲已經有全AI製作嘅短劇出現。香港嘅電視台或任何製作單位，唔應該再討論「用唔用AI」，而係「點樣用？」同「用成點？」。當然，更加關鍵嘅係觀眾嘅接受程度。我個人覺得觀眾從來都係得一個標準，就係要好睇。有AI而又用得好，可以展現現實中冇可能搵到嘅境界，為觀眾帶來新鮮感；同時《奧德賽》（The Odyssey）即使少用電腦特效，亦可以為觀眾帶來真實感與震撼力。
AI係大勢所趨，任何電視台甚至市民，都唔可能避開。而睇觀眾嘅接受程度，AI嘅布景喺網上被批評得體無完膚，網民逐格點評，話光影錯亂，仲話「假到腳都key走埋」。不過我聽講《三代同糖》開播一周，收視並冇咩下跌，身體永遠最誠實。