15/16年以冠軍賠率5,000倍，封王英超的李斯特城，功臣華dee、馬列斯、簡迪、岡崎慎司同小舒米高等球星，成為奇蹟主角，永誌不忘。十年過去，英超仍由Big Six統領，屆屆壟斷聯賽錦標，相反李城已跌落英甲，泰國班主心淡以2億英鎊將佢哋所有足球產業，包括值錢嘅新訓練場、女子隊同比甲下游嘅奧特海維利一併放盤，喺銀行仲有1億英鎊貸款未找數，令人唏噓。
英甲每季喺英超轉播費，攤分俾各級球隊嘅收入，每隊大約只有300萬英鎊，僅夠俾兩、三位李城現役比較出名球員嘅年薪。佢哋上周英甲首戰被剛升班嘅諾士郡逼和，隊中最值錢嘅世盃澳洲中堅哈里蘇達亞，隨時被賣走，打箭頭係前牙買加33歲嘅卜比列特，主帥係去季教咗蘇超格流4個月被炒嘅羅素馬田。隊波嘅新聞價值同球會市值一樣所餘無幾，要再創英國球壇奇蹟，唯有等白武士包括最識喺英超做生意嘅美國人打救；否則可以坐3萬幾球迷嘅王權球場攞嚟踢英甲，跟前英超球會盧頓、錫周三同雷丁混戰，認真嘥料。
