施丹沙維小心眼眉
今夏擴大嘅世盃，主要想造就小國上位製造話題，好似佛得角，不過去到埋身肉搏，歐洲佔今夏世盃8強6席，同打歐國盃分別唔大。球王美斯其後退出國家隊，只怕南美洲各列強嚟緊只能好似今次國際賽期，遠走亞洲同澳洲打友賽，表演性質賺戲金，缺乏真正實戰難有進步，追近歐洲。
相反歐洲足協已令歐國聯成為國際賽期大賽，分4個等級令實力接近嘅球隊對戰，唔會強弱懸殊，呢個大賽期就有英格蘭鬥西班牙，同埋德國對荷蘭；加埋名帥齊齊出山，即要點兵喺十多天連踢4場頂級賽事，點會想失威？歐國聯除咗係歐國盃決賽周入圍嘅救生圈，今屆新制好似A級4組最差兩支包尾即降班，小組最差兩隊第三名同小組最好嘅包尾兩隊，下年再打護級附加賽；喺同分計得失球下，估計列強喺今次頭兩場會盡出精英，唔敢揸流攤。英格蘭升返上A組自然提升歐國聯星味，亦可留意希臘有唔少國腳喺英超上位之中，今次同荷蘭、法國及塞爾維亞同列A2組，隨時有機會剃新帥施丹同沙維眼眉。