自從扭計想跳槽後，阿歷斯山齊士(山神)表現褪色，如果智利呢兩輪世界盃外圍賽，有乜差池，佢大可疊埋心水等明年一月，再向阿仙奴交轉會申請表。
長途賽，忌發力過早，鋒芒太露。智利連續喺上兩年稱霸美洲國家盃，加埋今夏洲際盃決賽輸畀「德國二隊」後；可能主力拼得太多，上月初，先後輸畀巴拉圭同玻利維亞，落到小組第6，仲衰過阿根廷。嚟緊香港時間禮拜五朝早，阿根廷迎戰第4嘅秘魯，都仲可看好；但智利主場鬥厄瓜多爾唔易踢，最後一輪更要作客榜首巴西，不易入番前4，直入世盃決賽周。
智利呢幾年好倚賴幾位喺歐洲頂級球會搵食嘅主力支撐，但門將哥迪奧巴禾喺曼城冇咗正選，山齊士同佢嘅中場孖寶拍檔、拜仁嘅維達爾今季喺所屬球會各入得1球。呢兩位仁兄都唔後生，拼搏太多，好難苛求場場咁勁。山神今夏喺阿仙奴受轉會困擾，明顯冇以前咁勁，隊友個個都知佢想走，喺隊中影響力減弱；嚟緊呢兩場太公波，國家隊再有差池，了無牽掛嘅佢，提早轉會機會更大。