阿歷走得好

英超好睇，最主要係普遍球隊蘊藏無限動力同激情。阿歷士張伯倫，剛戰成為紅軍喺入球騷擊退無敵曼城嘅大功臣，好多人之前質疑佢投向人工出手唔高嘅利記，但睇見佢踢到中場中位置，又尋回比賽嘅激情，真係戥佢高興。張伯倫恨踢中場中，之前阿仙奴滿足唔到佢，就算搶贏同位嘅師兄禾確特，但年復年踢右翼，進步唔多，又被質疑實力；結果新東家紅軍喺留唔住菲臘比古天奴後，剛戰踢4-3-3陣式，用張伯倫踢中場中並打開對手缺口，個人數據好省鏡，有3次關鍵傳送，觸球次數亦係全隊最多。大隻仔突變利記紅人，同班波一向講求速度同壓迫性踢法，唔怕同你亂鬥亂，鍾意搶死對手有關，睇嚟今夏世界盃，英軍會預佢一席。

有辦你睇，另一位阿歷——阿歷斯山齊士博球員生涯賺取最後一張肥約，唔肯留喺阿仙奴好合理。最慘係智利都無份踢世盃，留喺呢支英超列強中最冇朝氣嘅倫敦球隊多半季，毫無意義，北上投曼市有理。之後禾確特、奧斯爾、基奧特同最值錢嘅比利連，嚟緊會排住隊當逃「兵」。