怕輸才最強

聯賽長途賽如同跑馬拉松，無盡總到終點，要認清自己實力同策略，放得急，捱唔到尾，準會失望而回。

上輪英超，只見利物浦鬥阿仙奴離完場剩番唔夠2分鐘，一向急進嘅領隊高普，換走埃及球王穆罕默德沙拿，換入久疏戰陣嘅中堅祖爾麥迪比，大有守埋佢唔想衰收尾離開倫敦，呢一著幾深刻。紅軍連同剛剛輕鬆贏波上番1、2位嘅曼城同車路士，打咗11輪仍不敗，繼續創歷史；數據顯示，78至79年及90至91年球季，出現咁嘅鬥唔輸局面，冠軍必在其中。利物浦上季埋單輸曼城25分得第4，今季被外界視為藍月亮衛冕嘅最強對手。睇見紅軍進步良多，上季11場入21球失17球，兼大敗熱刺同曼城、今季11場入21球只失5球兼鬥Big Six未輸過；上季同期失14分、今季只失6分，並捱過早輪魔鬼賽程。再計英超3雄未來5場對手，紅軍一路延續不敗到年尾，機會比兩支藍軍大。怕輸才最強，長途賽唔係同對手鬥快放，最重要先做好自己，第4季教紅軍嘅高普，學懂了。