原來朋友嚟㗎？ 馬浚偉上山詩鈉後生飲酒飲到天光

馬浚偉與上山詩鈉(Anna)私下老友鬼鬼，就連黎瑞恩也非常好奇，為何他們會如此熟練。最近馬仔就邀請對方出席其製作及主持的電視節目《緣來自咖啡》，二人暢談當年情。

馬仔解謎：「當年我哋有個歡樂四人組，我、Anna、尹錦輝同埋甄楚倩，成日約埋飲酒吹水，無所不談，呢段日子真係好開心亦好難忘。」他表示與上山安鈉失聯多年，猶幸去年在機場相遇，大家見面即時來個擁抱，交換近況，恢復了聯絡，並承諾再約飯局，重組歡樂四人組。

馬仔不諱言那時年少輕狂，飲酒飲到傻，往往通宵達旦，回想當年真難以想像怎會那般狂：「但這段飲酒友情還是很難忘的，大家都年輕、都真心。今日同Anna傾偈憶往事，一下子所有回憶返晒嚟，Anna依然健談，有嗰句講嗰句，毫不掩飾，真情流露，冇見咁多年，覺得她仍然十分可愛，真到爆！」

上山安鈉亦很開心老友重聚，勾起許多以前一起的日子：「好似回帶咁樣，飲酒飲天光嘅畫面重現眼前，好好笑亦好回味。見番馬仔真係好開心，非常佩服佢嘅積極人生態度，不斷學習不斷進步，又多方面發展，成績可見，真的好厲害。」