真球王

今季歐洲球壇爆出「Mo仔」穆罕默德沙拿呢粒「紅」寶石，被譽為新美斯；但呢位利記新球王，始終要去到世界盃決賽周，才會係個人真正考驗嘅開始。

歐洲球壇正聚焦3大不同洲別嘅入球機器，以後生當打嘅埃及人Mo仔愈踢愈勁，個人技術超卓似美斯，暫以28球領先金靴獎。阿根廷嘅美斯平穩有25球，但3人中年紀最大、季初陷入球荒嘅C朗唔再係湊仔公，單係今年踢咗13場，連埋啱啱喺西甲同Mo仔一樣「大四喜」，入咗21球，聯賽就暫時有22球進帳，只比美斯少3球，排番第二。葡萄牙人C朗一向戰意同體能超強，年紀唔輕但仲長期處於比賽生涯高峯，今季要後上奪獎可能難啲，但呢位幫過國家隊攞歐國盃嘅真球王，從來貨真價實，無幾人可以質疑。

去到世界盃，大牌球星往往成敵方盯死對象，加上經一季拚搏，好多被譽為上位嘅新星受壓後，都未必踢得番聯賽嘅高水平。3人所屬嘅國家隊，喺今夏世界盃排上線，好有機會喺16強甚至8強碰頭，屆時先算係「新丁」Mo仔要登上球王級嘅初考驗。