Ad Block Ad Block
娛樂
2022-08-02 11:40:41

《洛奇》旁枝人物變主角 史泰龍冇得分 出post鬧爆監製係吸血鬼

分享:

荷里活一代大隻佬史泰龍,最為香港人記得嘅傑作有2套︰演Rambo嘅《第一滴血》系列,同埋演拳手嘅《洛奇》系列。好多人以為大隻佬得個body,未必知道46年前上映嘅《洛奇》第一集,係由史泰龍擔任編劇。套戲當年以一百萬樓下成本,刀仔鋸大樹鋸出2億幾美金出嚟,差唔多係而家嘅10億!

愛之深責之切,難怪呢期龍爺要出post鬧爆當年《洛奇》嘅監製Irwin Winkler ,拎住佢嘅劇本,將片中嘅配角人物借題發揮,拍成多套新片,而龍伯一毫子都冇得分。

是咁的,當年合約制度未太盛行未太仔細,史泰龍又未係大人物,即使《洛奇》個劇本係佢寫,主角又係佢做埋,2樣加埋都係收到7萬5咁大把,連埋分紅有250萬。以2億幾美金票房計,只係分到半啖飯。2015年,Irwin Winkler 開拍由Michael B Jordan主演嘅Creed,主人翁Donnie正是《洛奇》系列入面,同洛奇化敵為友嘅黑人拳手Apollo Creed 個仔。史泰龍喺Creed入面繼續飾演洛奇,以叔父身份指點Donnie,套戲收得之餘,龍爺亦獲提名金像獎最佳男配角。2018年嘅Creed續集都有龍爺演出。

龍爺爆seed開名鬧Irwin Winkler

但係2019年史泰龍公開表示自己對於《洛奇》完全冇控制權感到火滾,上個月更加表態,因為故事方向有變,下年3月上映嘅Creed III唔會有佢份參演,但自己會支持呢套戲,而龍爺亦係套戲監製之一。真正令龍爺爆seed嘅導火線可能係舊年11月點著,有報導話片商打算將當年喺《洛奇第3集》打死Apollo Creed嘅俄國拳手Ivan Drago,以佢同喺Creed II已經出現嘅阿仔Viktor,開拍新片Drago。消息傳出後,龍爺已經出post開名鬧Irwin Winkler 吸血鬼。直到近排,龍爺再喺IG鬧爆Irwin Winkler 同佢啲仔係寄生蟲,仲將Irwin Winkler 張相整成吸血鬼咁款,一啖咬落洛奇條頸度。

Irwin Winkler 一方未有回應,但係多年前嘅報導提到,合約只係確保洛奇由史泰龍飾演,咁聽落又真係冇錯喎。

電影LOL︳《洛奇》旁枝人物變主角 史泰龍出post鬧爆監製係吸血鬼

電影LOL︳《洛奇》旁枝人物變主角 史泰龍出post鬧爆監製係吸血鬼

原文刊登於 Yahoo娛樂LOL,am730獲授權轉載

Ad Block
請接受以下私隱政策及免責聲明,以示你同意am730內之私隱政策及免責聲明。了解更多
接受