TVB早排搞劇集投票選舉，最高票嘅2套會喺深夜重播。呢期播嘅《男親女愛》就係其中一套，而接力《男》喺下周一播出嘅，就係1984年經典作《天師執位》。《天》係以近3成票數脫穎而出，相隔22年後再次重播。
最大賣點係翁美玲
《天》最大賣點可能係當年極速冒起嘅翁美玲，當時翁只係出道2年，已經憑《射鵰英雄傳》演黃蓉一角深受歡迎，《射鵰》同《天師執位》更創下收視超過60點嘅佳蹟，而《天》亦係1984年最高收視劇集，可見翁美玲當時嘅人氣。只可惜劇集播出後一年，翁美玲懷疑尋短逝世。
《天師執位》主要講述張天師（劉丹飾）與宣慈（石堅飾）之間嘅正邪大戰，及徒兒司徒文武（苗僑偉飾）與林楚燕（翁美玲飾）之間嘅動人愛情故事。楚燕對文武一往情深，可惜因文武嫌棄其刁蠻，於大婚當日憤然休妻，其間文武迷戀花凝鳳（蔣麗萍飾）並慘遭利用，原本浪子回頭欲與楚燕重修舊好，可惜就在此時楚燕元神遭魔頭所奪，救妻心切嘅文武冒險修練心魔大法，可惜惹來無窮後患。
原文刊登於 Yahoo娛樂LOL，am730獲授權轉載
