同Johnny Depp 打官司打到形象破裂兼失業嘅Amber Heard，據聞無戲拍避走西班牙居住，暫時手上作品得未出事之前拍落嘅《水行俠2》，以及以1900年代為背景嘅驚慄片In The Fire。
將出席公開場合宣傳《In The Fire》
冇戲拍都要見人嘅！據外媒Deadline報導，Amber Heard將會露面為In The Fire宣傳。電影由Conor Allyn執導，Eduardo Noriego及Amber Heard主演，Heard於戲中飾演38歲心理學家，由紐約出發至偏遠地區，以心理精神角度調查男童被惡魔附身案件，過程未獲民智未開嘅村民體諒，反而處處留難，仲企圖置男孩於死地。
未知會否回歸影圈
電影In The Fire將於義大利舉行嘅第69屆Taormina 電影節（Taormina Film Festival)做世界首映，Amber Heard將會聯同導演Conor Allyn一同出席影展首映禮。呢次係Heard自家暴官司敗訴後首個公開出席場合，相信會吸引唔少媒體到場。
未知Amber Heard是否計劃回歸，出席公開場合爭取曝光。如果消息屬實，相信會有唔少八卦、小報媒體報道，不過要扭轉觀眾印象，以及重新得到業界支持相信好困難，因為官司期間爆出太多細節令佢形象插水。加上以往佢曾經靠靚樣做賣點，本身無咩演技代表作，而個世界唔缺靚花瓶，睇住網路風評做決定嘅荷里活片廠，應該唔會冒險搵佢拍戲……住。
或與前夫Johnny Depp同場
電影節同場仲有佢前夫、有型有票房保證又有多部代表作兼贏咗官司嘅Johnny Depp，新作《杜巴利伯爵夫人》早前於康城首映時獲得不俗評價，至少歐洲市場未因官司冷待Johnny Depp！
雖然Depp同樣未重返荷里活，不過同Heard情況唔同，迪士尼已經放話對同Depp再合作《加勒比海盜》持開放態度。不過Depp因為片廠官司未判而選擇唔合作，Heard就未必有得揀 job。又即管睇下電影6月24日首映後可否幫Heard一洗劣勢！
原文刊登於 電影LOL
