2025-11-18 16:15:55

林子博對亡妻照哭泣紓壓　遵遺願等三大原因攜子女移英

現年54歲嘅前TVB娛樂新聞台主播林子博，2003年與圈外人董燕君（Shirley）結婚，其後誕下囡囡林詠渝及囝囝林卓楠，一家四口幸福美滿。但喺2019年林子博慘食「無情雞」被TVB不再續約，而其太太亦喺20年不敵癌症逝世。唔經唔覺林子博與一對仔女已經移民4年，近日佢哋接受傳媒訪問，剖白移英三大原因及分享移民背後嘅心路歷程。

喺訪問中，子博表示移民英國有三大原因，第一個原因係佢覺得好辛苦，原因係香港有好多畫面，而呢啲畫面就係屋企、太太嘅遺物、屋企嘅陳設、同老婆行過嘅地方，好似連去金鐘都會令佢諗起喺紅棉路註冊結婚，香港有好多美好嘅東西，就係因為有太多美好嘅東西，所以對佢嚟講就變成一種痛苦。

睇唔到留喺香港有啲咩發展

而第二個原因就係佢睇唔到自己留喺香港仲有啲咩可以發展，佢表示自己離開香港嘅時候係50歲，睇唔到自己未來10年仲可於有啲咩發展，唔係香港市道嘅問題，係佢自己年齡嘅問題。同時佢亦諗唔到可以為仔女裝備或者做啲咩嘢，所以就突然諗到如果仔女喺外國升學，似乎有前路。

不過最重要嘅原因都係遵從亡妻遺願，子博表示太太Shirley曾經講過細個嘅時候好想去外國留學，不過可惜冇呢個機會，所以子博就索性帶一對仔女去另一個地方留學，舉家移民英國曼城過新生活。

被問到習唔習慣英國嘅生活，囡囡林詠渝及囝囝林卓楠都表示習慣，詠渝就話雖然活動冇香港咁多，不過其實佢覺得舒服啲，每次返嚟香港都覺得節奏好快，而英國就會放鬆晒，不過有時悶啲。而卓楠就話雖然習慣，不過自己英文本身唔太好，同人溝通就冇咁方便，子博就認為卓楠只係謙虛；同時佢又大讚仔女而家講嘢比之前有自信，尤其係詠渝，而家會多咗好多表情同身體語言。