林日曦與梁祖堯首度合作演舞台劇《大反枱日》。
林日曦繼《大辭職日》、《大MK日》、《大初戀日》及《大離婚日》後，延續「大XX日」系列傳統，宣布推出年度癲喪喜劇《大反枱日》。今次邀得會作的「舞台劇帝」梁祖堯(阿祖)參演，兩人首次合作即反枱反櫈反埋蓆，誓要於香港演藝學院歌劇院反出巨型舞台劇。一連21場演出門票，將於明天(26日)早上9時起於Cityline公開發售。
反枱大賽 飲恨「梗頸四」
「腦細」林日曦前年曾於日本參加世界反枱大賽，當時飲恨只得「梗頸四」，但反而激發創作靈感，助他寫起《大反枱日》的劇本，他笑指：「喺日本參加完世界反枱大賽之後萌生呢個念頭，雖然我只係攞到第四名，畀三個日本人贏咗，不過佢哋只係個記錄遠過我，但係氣勢麻麻哋。我覺得香港人先係全世界最適合反枱嘅人，隨街都見到啲人鬧交反面，大家都好好火。」至於今次為何「挑機」邀請梁祖堯？林日曦語帶調侃：「因為覺得佢紅，想叨佢光，同埋偷佢fans⋯⋯」
林日曦與梁祖堯首度合作演舞台劇《大反枱日》，一連合演21場。
睇過林日曦所有作品
梁祖堯則自言幾乎睇過所有林日曦的作品，無論是「大XX日」系列還是Talk Show，其中尤以《林日曦細聲講悲但真》最令他難忘。他興奮表示：「一直都好想同佢合作，唔係客套說話，係真心嘅。人生去到呢個階段，好想同多啲自己欣賞嘅人合作，睇下擦到啲咩火花出嚟，又可以刺激創作，開闊眼界，所以收到邀請嗰刻，真係好驚喜，好開心！」 阿祖更盛讚林日曦的笑位獨特，「佢成日話自己內向、怕羞又有反社會人格，但其實佢內心同講出嚟嘅嘢都係一個暖男，會溶化你，呢個反差好有趣。」
ADVERTISEMENT
