柏林馬拉松｜林海峰傷癒失準錯過Sub 4 自嘲「但求無痛抽筋」

「世界六大馬拉松」之一嘅德國柏林馬拉松星期日（9月24日）完滿結束，娛樂圈中長跑好手林海峰都飛到當地參賽。Jan於IG post出比賽成績，以4小時02分26秒完成。翻查大會紀錄，阿Jan做出時間係4小時02分17秒。

林海峰早前因傷停操4周

林海峰堪稱香港馬拉松全馬成績最佳藝人，2018年已經5字頭嘅Jan參加日本琦玉馬拉松，做出3小時13分嘅個人最佳時間PB。他去年參加英國倫敦馬拉松，跑出3小時18分08秒佳績。Jan今次「柏林馬」以4小時以上成績完賽，與PB相比確實未如理想。不過有跑友話賽事當日柏林天氣炎熱，而且林海峰早前都透露因傷而要暫停操練4個星期，相信今次Jan狀態麻麻。睇返林海峰今次「柏林馬」分段時間，後半段同前半段時間爭30分鐘有多，後勁不繼。難怪賽後林海峰出post都話「豈能盡如人意，但求無痛抽筋」。不過咁，55歲嘅林海峰做出呢個時間，都快過好多後生！

原文刊登於 Yahoo 娛樂圈