2025-07-18 20:00:00

田啟文爆Netflix唔吼港產劇集電影原因「人地嫌你地煩呀」

香港票房有限公司公布2025年上半年度香港電影市道整體情況，港澳兩地首輪上映的電影總數為140部，當中香港電影僅佔21部，中西片票房總收入近5億6352萬港元，與去年同期收入比較，票房下跌約16.26%。港產片上半年最高票房是由年輕金馬影后鍾雪瑩主演的《看我今天怎麼說》，收入為1,355萬港元，對比非香港電影最高收入三甲嘅《哪吒之魔童鬧海》（6,391萬）、《職業特工隊︰最終清算》（5,220萬）及《史迪仔》（2,912萬）頓然相形見絀。

田雞：咁多人有意見人地嫌你煩呀嘛

同周星馳合作多年嘅電影監製田啟文（田雞）早前接受訪問，分析香港電影發展。同記者傾到有冇機會搵近年大灑金錢嘅串流平台如Netflix，投資開拍港產影視作品時，田雞直言「唔係冇去傾嘅……人地嫌你煩呀嘛。煩呀你，明未？咁多顧慮，你咁多人有意見，嗰啲人（指有意見者）又唔係拍戲嘅人又唔係觀眾，但係佢有聲出嘛……咁（串流平台）就『唉哎，唔好啦』。妮歌潔曼套戲香港拍架，都唔喺香港上呀，唔好煩。就咁簡單」。田啟文又透露，Netflix每年有十個投資亞洲作品嘅名額，當中韓國佔咗6個，其餘就由日本、台灣、泰國等地嘅作品瓜分。

田啟文同意串流平台注資可以提升一個地方嘅影視作品質素，「永遠你有資本有市場，點會冇提升啫。我地香港拍多啲數量，你本來唔係主角都變主角啦。所有嘢都係操返嚟架嘛」。

原文刊登於 Yahoo 娛樂圈