近年唔少學校搞嘅歌唱比賽已經唔止係校內話題，早排有中學生唱MC張天賦嘅《記憶棉》唱到七情上面跪埋地，演出片段放上網之後引起迴響，連原唱MC都有出post為同學仔打氣。同樣係唱《記憶棉》，16歲女生Apple嘅演出片段更加有五十幾萬人睇過，甚至令佢被天王黎明賞識，簽埋做歌手！
中六生唱《浮誇》令Serrini讚不絕口
日前港島傳統名校皇仁書院搞歌唱比賽，好揼本咁邀請女歌手Serrini做表演嘉賓同評判。估唔到參加者同樣高質，中六嘅李同學越級挑戰陳奕迅嘅《浮誇》，令Serrini讚不絕口，最後仲拎埋冠軍。片段放上網之後當然有唔同睇法，有網民認為李同學嘅演出有唔少沙石，但亦有人認為「中學生有呢個水準仲想點」，又串負評網民「留言真係多專家」。
陳奕迅嘅《浮誇》收錄喺2005年嘅《U-87》專輯，向來係唔少歌唱比賽嘅熱門選曲，就連因為《聲生不息》而爆紅嘅曾比特(Mike)，3年前參加《全民造星2》初賽都係唱《浮誇》而入圍。早前商台嘅生力軍音樂會，MC張天賦都有唱過呢首歌，被認為有力挑戰陳奕迅！
原文刊登於 Yahoo娛樂LOL，am730獲授權轉載
