朱栢康和朱栢謙兄弟檔出席《試當真白金像獎》頒獎禮。(娛樂組攝)
「試當真」頻道昨晚(6日)中秋節於黃埔舉行《試當真白金像獎》頒獎禮，朱栢康和朱栢謙兄弟檔出席，朱康與古天樂角逐最佳搭膊頭獎，他笑言，「球證球迷球員都係佢哋嘅人，點會係我攞？」朱謙則獲贈生髮水，哭著臉表示竟要「從頭來過」，與古天樂競逐最佳新演員獎。話雖如此，朱栢康憑《死侍應》獲頒最佳男配角獎，他在台上表示，「呢個獎感覺好珍貴，我在台上都講，佢哋喺呢個generation紀錄咗大家嘅痕跡，作為算係其中一分子，proud of 佢哋。我唔覺得佢哋係最終章，只係未來佢哋用另一種形式存在，我相信佢哋會在其他工作環境下又會走埋一齊。最重要佢哋能唔能夠繼續秉承住，自己試過當真嘅嘢延續下去。」
接著，朱康認真表示，「雖然唔係佢哋中堅成員，我覺得佢哋非常叻，做咗啲嘢出嚟！」朱栢謙亦表贊同，並表示希望將來可一齊再合作，「佢哋精神非常可嘉，祝願試當真所有兄弟姊妹，江湖見面仍保持試當真精神。」
七年前芬蘭電影在港上映
朱栢康參演的芬蘭電影《程師傅》(Master Cheng)將於明年1月在東九文化中心上映，朱康表示毫不知情，他直言是7年前的作品，仍有演當地的女主角和團隊聯絡，並希望多與海外或不同界別團隊合作，交流經驗，百利而無一害。問到是否現階段更適合接演這戲，他坦言，「當時對Camera acting仲係好新，其實掌握得唔好，但這戲的確幫我返港拍《金都》，作咗好大準備。好多年後睇返一部作品，一定好多感覺，好同唔好，但必須接受你當刻已被紀錄咗。」
見證張繼聰為《金童》脫水苦練
接著《金都》之後，朱康就參演張繼聰的《金童》，對於作品終於面世，他形容是「千呼萬喚」，「真係花咗好多心血，我真係見證住Louis(張繼聰)喺套戲嘅付出。」對於阿聰自資6位數字做後期製作，朱康就表示事情不知道，「佢係好沉著嘅人，唔會講太多，總之年事出到來就係終極目標。作為兄弟，一定會好撐，見到佢好辛苦，有難關，但都會迎難而上。」他表示若時間許可，不介意一齊謝票，他憶述當年戲裡戲外都跟阿聰一齊捱，「唔係撳個掣就得，佢用咗兩三年時間，增肥上磅又落磅，最後連續拍打戲，拍一個禮拜，佢就脫水一個禮拜，keep住肌肉量同線條。」朱謙補充指要脫水同時專注拍戲，絕不容易，朱康續說，「脫水唔係唔飲水，而係狂飲水將鹽份排，脫水脫鹽好似打咗懵仔針。記得有場戲，我已經拍到記唔到嘢，但有場同Louis對打戲，佢話：『唔緊要，你真係打我啦」，因為越遷就反會拉長拍攝時間，好難忘。」
ADVERTISEMENT
