Ray Online｜曾俊華搭網約車司機不諳廣東話　幾十年屋苑「直頭冇聽過咁」

網約車規管法例大部分條文月初已經生效，政府亦即將邀請有興趣平台申請服務牌照。前財政司司長曾俊華話，近日喺香港搭到一個手車完全冇問題嘅網約車司機，只係對方完全唔識廣東話，亦似乎完全唔熟香港啲路，連佢要去嗰個已有幾十年歷史嘅屋苑都直頭冇聽過咁，好彩最終成功靠GPS導航順利抵埗。

反思科技幫助係進步定退步

上禮拜初去咗公幹幾日嘅曾俊華，今日喺社交平台分享喺香港機場叫網約車返屋企嘅經歷。佢話當日喺機場落機之後，就叫網約車返屋企，接單嘅係一位講普通話、完全唔識廣東話嘅司機，形容對方駕駛技術完全冇問題，能夠妥當顧及路上安全情況。不過，曾俊華發現到對方似乎完全唔熟悉香港嘅道路，連佢住緊嗰個有幾十年歷史嘅屋苑，司機都直頭好似冇聽過咁，「令我有啲意外。」

最終網約車司機都成功靠GPS導航指點慢慢揸，順利將曾俊華送到返屋企。佢話最近都有幾次類似經驗，事後喺度諗有科技幫助之後，唔熟路司機都照樣可以照單，「呢個係進步定係退步呢？呢個對乘客係好事定係壞事呢？」