葉劉淑儀聯同警務處處長周一鳴復刻電影《花樣年華》橋段宣傳防騙。
今日係中秋節，除咗每年必睇、新民黨主席葉劉淑儀賀中秋嘅旗袍相。佢今年仲聯同警務處處長周一鳴復刻電影《花樣年華》橋段宣傳防騙。
短片中，葉劉著住旗袍登場。「一哥」周一鳴見到葉劉現身，問：「點解會係你嘅？」葉劉反問「點解唔會係我呢？」一哥話代號「豺狼」嘅目標有動靜，今年中秋有危機。葉劉話點止有動靜，留意到佢哋已經滲透好多組織。佢手上嘅保溫壺就係喺前線截到嘅機密。
葉劉繼續話呢班人無時無刻都搵機會入手，恐怕月圓之夜就係行動之時。而騙徒除咗會利用假投資網站外，仲會扮投資專家呃人，真係乜都可以假。「一哥」和應話市民如果唔留神，畢生積蓄可能就會喺中秋前夕被搜刮一空，不過警隊已經部署好防線。葉劉聽到就話放心晒，最後邀請「一哥」一齊賞月。
葉劉指過足戲癮
葉劉喺社交網站話今年中秋搞搞新意思，同周一鳴拍攝防騙宣傳片。佢透露呢段片由構思、拍攝再到面世，整整花咗幾個月。因為警隊好嚴謹，先後構思咗幾條「大橋」，最終以中秋版本定案。而警隊亦用心揀場地同道具，至於葉劉就悉心選擇咗片中旗袍配合拍攝。葉劉話拍攝前夕，佢攞住劇本反覆背對白。到拍攝嗰陣，一個場景拍攝唔同角度，可謂過足戲癮，體驗難得。
ADVERTISEMENT
