Ray Online｜民建聯賀年橫額2024年變「2420年」　指有人喜歡做勞作改橫額

踏入新一年，大家初初可能都會唔小心寫錯「2023年」，但有街坊發現民建聯賀年橫額竟然仲離譜，寫錯「2420年新年快樂」喎。

民建聯分享橫額原本版本

有關橫額係民建聯大埔支部懸掛嘅，民建聯主席陳克勤同大埔支部主席、大埔區議員胡綽謙就喺社交網站分享橫額嘅原本版本，話佢哋係祝大家2024年新年快樂，不過有啲「鍾意做勞作」嘅「小朋友」，就想祝大家2420年新年快樂。不過佢又話2024年又好，2420年又好，新年快樂都係重要嘅，大家新年笑哈哈啦！

胡綽謙：小問題唔會報警

胡綽謙回應《am730》查詢，話喺上個月30號懸掛有關橫額，當時係正確版本。至到今日就收到好多錯誤版本嘅橫額相片，佢解釋橫額上面嗰幾個數字係用紙痴上去，相信係有人搣落嚟互調咗字粒次序。佢話已經過咗元旦，會直接除下橫額，亦唔會報警處理，形容都係小問題。