「快閃追心團」一連5日舉辦，第一日就去到深水埗桂林街。(活現香港提供)
巨型紅心飄浮裝置Chubby Hearts嚟咗香港幾日，除咗「大心」會喺中環皇后像廣場花園展出去到下禮拜六(24號)之外，每日下晝至夜晚仲會有「細紅心」喺唔同地區「快閃」。成立超過10年、主打本地深度遊嘅文化企業「活現香港」亦把握機遇，今日(19日)開始一連5日推出「快閃追心團」，希望帶領參加者喺「追心」嘅同時，亦都可以聽下隨團嘉賓分享，同時認識地道文化同社區。
今日用城市速畫紀錄深水埗風貌
活現香港話，每日只會舉辦一團「快閃追心團」，全程約一個半鐘、費用全免。今日第一團就追隨「細紅心」去到深水埗桂林街，20名團友同埋嘉賓城市寫生團隊「畫下嘢」就喺附近嘅福華街出發，沿途介紹區內特色建築與地道特色，仲喺桂林街用城市速畫(Urban Sketching)，以「細紅心」做背景紀錄深水埗嘅獨特景觀與風貌。
活現香港創辦人陳智遠就話，大型活動能夠為旅客甚至本地市民帶嚟嶄新體驗，佢哋就期望透過舉辦特色快閃團，將文藝活動同地道文化互相結合，創造獨特及有趣嘅城市旅遊體驗，令參加者能夠更進一步感受到社區文化氛圍同內涵。
每朝9點半揭曉當日行程
一連5日嘅「快閃追心團」每日會有唔同嘅特邀嘉賓參與，嚟緊禮拜三(21號)同禮拜五(23號)就分別係《緣路山旮旯》導演黃浩然同香港遺美版主林曉敏。由於「細紅心」每日清晨先會公布當日去向，「快閃追心團」會每朝9點半先會喺佢哋官方報名網頁揭曉當日行程，又提醒每次最多可以為兩個人報名。
