醫衞局高官拍片呼籲大家齊齊投票。(醫衞局片段截圖)
改制後嘅區議會選舉下個月10號舉行，唔同政策局嘅高官繼續輪流呼籲公眾投票，最新就輪到醫務衞生局喇。醫衞局局長盧寵茂聯同常任秘書長陳松青、副局長李夏茵同衞生署署長林文健，就合力喺政府總部拍咗條片呼籲大家投票。
全長33秒嘅影片，盧寵茂話今次係完善地區治理體系後嘅第一場選舉，形容意義重大，李夏茵就提到區議會關心民生事務，與大眾息息相關，陳松青同林文健之後就呼籲大家當日要齊齊去投票。片段最後就係佢哋4個坐喺政總會議室外，一齊讀返今次區選嘅口號。
曾呼籲打流感針等選舉更安心
其實盧寵茂今次都唔係第一次提到區議會選舉喇。佢上個月中去立法會出席議員接種流感疫苗活動時，就話下個月投票日將會係流感高峰期，如果大家想選舉安心啲就可以預先打針，仲不忘叫議員落區推動選舉嘅同時推廣埋打流感針！咁多日嚟Ray都睇過由唔同局長、部門首長拍嘅宣傳片，唔知大家又覺得邊條最好呢？