Ray Online｜鄭泳舜倡邀請碧咸出席「夜繽紛」活動 「食吓嘢買吓嘢」
由碧咸做班主﹑阿根廷球王美斯領軍嘅美職球隊國際邁亞密，將喺2月4號訪港踢表演賽。民建聯立法會議員鄭泳舜今日喺大會上，建議政府邀請碧咸出席「夜繽紛」活動，「去吓夜繽紛嗰度食吓嘢，或者去吓啲名店商場買吓嘢」。
政府指會商討禮遇安排
立法會口頭質詢原本係討論緊恢復「一簽多行」措施，不過鄭泳舜就利用機會，追問碧咸同美斯訪港事宜。文化體育及旅遊局副局長劉震回應話，將同組織單位商討一啲禮遇安排，希望佢哋接觸到香港最優秀嘅一面，再借勢向全世界宣示香港優勢。鄭泳舜又問到因應碧咸同美斯訪港，當局點部署、點樣安排交通。劉震話政府舉辦盛事前有跨部門會議，確保有秩序進行活動。至於賽會官方聽日會舉行傳媒發布會，文化體育及旅遊局局長楊潤雄同中國香港足球總會主席霍啟山亦會出席。
