馬逢國今日做立法會大會代主席嗰時，又唔小心瞓着咗。(立法會直播截圖)
立法會今日(12日)舉行休會前最後一次大會，下晝二讀辯論《2023年罰款及定額罰款(公眾地方潔淨及阻礙)(雜項修訂)條例草案》期間，就由內務委員會副主席馬逢國做大會暫代梁君彥做主席。不過佢做咗大約半個鐘之後，竟然唔小心瞓着咗，要由秘書叫咗3次「主席」同1次「馬生」之後先醒。
馬逢國要左邊嘅秘書叫咗幾次先醒。(立法會直播截圖)
秘書：主席、主席、主席、馬生
事發時社福界狄志遠啱啱講完佢4分幾鐘嘅發言，正當議會內大家都等緊馬逢國叫下一位，即係勞聯林振昇發言嘅時候，全場突然靜咗5秒，之後就出現要由秘書叫醒佢嘅一幕。馬逢國事後同傳媒解釋，話自己最近瞓得唔好，噚晚(11日)更加3、4點都未瞓到，又話頭先都只係一、兩秒時間，秘書一叫佢都即刻噏得出下一個議員嘅名。
Ray記起馬逢國做代主席瞓着都唔係第一次，佢舊年12月做代主持嗰時，又係閉目養神咗幾秒先指示下一位議員發言，當時佢解釋嗰排忙於預備港區全國人大代表選舉，同埋準備《2022年版權(修訂)條例草案》嘅發言稿，所以前一晚只係瞓咗大約兩個鐘。
澳門旅遊｜今晚9點開搶！ 澳門新濠影滙自助餐優惠 送8字摩天輪門票
▼按圖輯紓緩腰背痛3招下背伸展▼
