葉劉中秋節再有旗袍「福利圖」　鄧炳強燈籠街攬狗打卡｜Ray Online

每逢佳節，行政會議召集人葉劉淑儀都唔少得大派福利，今年中秋節佢又着上旗袍影靚相。見到佢着上銀白色嘅合身短旗袍，露出一雙玉臂同美腿，攞住一個燈籠仔，輕輕仰望上方影相。背景就寫上「迎中秋，共團圓」，「一年容易又中秋，月餅花燈慶團圓」。

葉劉提到今年係社會邁向全面復常後，迎嚟嘅首個中秋，一家團聚品嚐月餅，仲有外出賞花燈、慶團圓，的確係賞心樂事。佢仲話今晚月亮會非常明亮，鼓勵大家一齊賞月啦！

鄧炳強燈籠街攬狗打卡

另一邊廂，保安局局長鄧炳強亦都發文預祝中秋，佢提到舊年中秋節去咗元朗燈籠街買燈籠過節，俾嗰度琳琅滿目嘅燈籠同熱鬧氣氛深深吸引。佢今年再去燈籠街，仲邀請到燈籠紮作師傅即場教佢整金魚燈籠，佢話成個製作過程，由扭線到黏貼裝飾，真係一啲都唔容易，多謝師傳用心教導，令到製成品都見得吓人。鄧炳強當日仲見到好多市民帶埋寵物嚟打卡，真係唔講都唔知燈籠街有呢個傳統，吸引到佢都忍唔住攬住可愛嘅狗仔打卡添。