2025-08-22 16:43:13

港男慳錢大計提醒盡用港鐵2蚊特惠站：一月慳一餐飯（附41個位置）｜網上熱話

一名男網民於社交平台發表「慳錢大計」，其中一項計劃是盡用「港鐵$2特惠站」，「一個月慳返一餐飯」，提醒一眾網民齊齊慳錢。(Threads)

本港經濟不景，失業裁員潮隨時殺到下，不少打工仔已勒緊褲頭過日子，日常支出慳得一蚊得一蚊。一名男網民於社交平台發表「慳錢大計」，其中一項計劃是盡用「港鐵$2特惠站」，「一個月慳返一餐飯」，提醒一眾網民齊齊慳錢。

樓主周四（21日）在社交平台Threads以「慳錢攻略」為題，上載「港鐵$2特惠站」相片發帖，留言稱「自從開始咗慳錢大計，每一次搭港鐵之前都會睇吓附近有冇呢部$2機先，如果距離我5分鐘內行到嘅話一定過去嘟一嘟，每日慳少少，一個月慳返一餐飯㗎」。自言「窮L慳得一蚊得一蚊」的他整合了全港各區不同地方的41部$2機位置，方便網民參考，「希望幫到大家一齊慳錢」。

「港鐵$2特惠站」使用方法簡單，用成人八達通拍一拍「港鐵特惠站」，並於指定港鐵站入閘，即慳$2，惟位置需對照本身附近港鐵站才享優惠，如中環至半山自動扶手電梯系統可於中環站、香港站、上環站使用。以將軍澳線為例，於將軍澳TKO Spot商場拍八達通後，只限在港鐵將軍澳站入閘才可享受優惠；於坑口富寧花園商場特惠站拍卡，只能於坑口站使用。

網民「發現新大陸」不知附近可拍卡

雖然2蚊特惠站推出多時，港鐵官網亦有列出位置，但有網民似乎才發現其附近可拍卡，感謝樓主轉貼位置「你提咗我聽日要嘟」，亦有人驚訝「咦！原來油麻地駿發花園（商場）都有？」、「原來頌安（商場）有我都唔知添」、「尖東站比較近和方便」。不過，有網民細看位置表後，發現「大西北一部都冇」、「Sad（傷心）屯元天（屯門元朗天水圍）冇」，亦有人不滿稱「廿年前已經$2，通脹咗咁多年都仲係$2，仲要啲機越擺越遠。」