鄧炳強身穿23號球衣　指「背負23，迎難而上」｜Ray Online

政府喺施政報告提到出年會就基本法第23條立法，備受觸目，主事嘅保安局局長鄧炳強接受訪問嗰陣，內容好多時都圍繞住立法工作嘅籌備事宜。唔知係咪有感而發，佢今日喺社交網站上載自己喺足球場上身穿波衫嘅背影，波衫上面正正就係23號。鄧炳強提到「背負23，迎難而上」，話今日望住月曆，堅定前行嘅心，為香港堅守使命，呼籲大家同佢一齊砥礪前行。

鄧炳強穿23號球衣皆因米高佐敦

無論喺早前立法會同特區官員舉行嘅足球友誼賽，抑或香港紀律部隊同深圳聯隊合辦嘅「深港口岸足球友誼賽」，其實都見過鄧炳強着住23號波衫，但似乎唔係為咗基本法23條而揀，鄧炳強解釋主要係因為佢鍾意以着23號波衫而聞名嘅NBA傳奇球星米高佐敦。