上屆英超冠軍李斯特城突宣布解僱領隊雲尼亞里，大家都估唔到，雲尼帶領球隊贏得歷史上首個英超聯賽冠軍，早前又攞咗2015-16年英國最佳領隊，最終都會俾球會炒魷。
好明顯，主因係球隊今屆成績強差人意，上周喺英超排名17，可以講頻臨降班邊緣，踏入2107年更加係未嘗一勝，歐聯十六強首回合又輸俾西維爾，令老闆一怒而痛下殺手。
去年冠軍，今年隨時要降班，令博彩公司大跌眼鏡，原因可能今屆其它球隊已熟識李斯特城嘅反擊踼法，有所針對；其次球隊話晒係舊年冠軍，各隊跟佢對賽時，自然不會輕敵，更加專注。另外，球隊中場攔截力十分強勁嘅簡迪俾車路士撬走，嚴重削弱李斯特城嘅第一道屏障；而早前非洲國家杯，球隊幾名非洲主力要為國家隊效力，都大大影響英超成績。
辜勿論點，成王敗寇。睇到李斯特城，令人諗起沽神保爾森，佢喺美國次按一役勁沽美股，結果一戰定江山，成為美國大冧市嘅大贏家，贏得沽神美譽。點知佢其後表現大走樣，買黃金就金價跌，投資嘉漢林業就被沽空機構踼爆做假，損失超過十億港紙。
我哋投資股票或基金，最怕就係大起大跌，你今年贏爆廠，明天輸到仆街，作為投資者或分析員，根本無法去預計。當年永菱通基金嘅掌舵人洪錦標，基金好大比重投資一隻買意馬，適逢意馬（0585）創作忍者龜動畫勁賺，洪錦標一戰成名，贏幾十倍，成為年度最佳基金經理。點知成也意馬，敗也意馬，公司重本投資一套動畫阿童木，點知票房大失利，股價插水，永菱通基金勁蝕。
投資者追求嘅係穩定回報，唔係要驚嚇，當然你係短炒就另計，但基金最重要做好風險管理，唔係去澳門賭大細，當碰上李斯特城嘅股票或基金，你可以做啲乜，我想都係三個字，「少沾手」。