藝人災難下的掙扎
大埔火災數以百計人死傷，由富豪到學生都化悲痛為力量，用自己嘅方法出力。而藝人做啲咩，唔做啲咩，更為矚目。作為一個人，同時作為一個藝人，面對以下情況有咩掙扎呢？
一、應否出席盛事做嘉賓？
MAMA事隔7年再來港舉辦，原本MIRROR會上台表演，最終開騷前發生火災，決定不出席。喺MAMA表演唔只係個人榮譽，仲可以將香港音樂帶上國際舞台，非常難得。聽聞MAMA非常之嚴格，表演單位每日都要向主辦證明有排練，所以相信鏡仔們已落咗唔少苦功，加上鏡粉搶晒飛入場支持，可以想像，決定唔出席鏡仔同鏡粉都會唔開心。不過，作為藝人上到台就必須娛樂大眾，收起個人情緒，但災難之下又點能如常表演，相信大家都體諒。
二、應否繼續開演唱會？
承上，災難之下，藝人要如常娛樂大眾係好難，但演唱會冇其他人頂上，又涉及大量人力物力，臨時取消不但影響觀眾，亦牽連幕後工作人員心血。我見唔少歌手把歌酬轉化為慈善性質，將部分收益捐作賑災用途，或在演出中加入悼念環節，減少對台前幕後嘅影響之餘，都可為大家喺艱難嘅時刻用音樂療癒大眾。
三、應否公開自己有捐錢？
捐錢本來係一件好個人嘅事，多少都係盡點心意。但對藝人嚟講，唔捐又俾人鬧，捐得少又俾人話，公開又有人話做騷，好似點做都唔啱數。不過有時唔係藝人想公開，而係慈善機構都想借助名人嘅號召力，令更加多人捐錢，發揮藝人嘅影響力，對社會做更多有用嘅事，唔係先至符合大家嘅期望咩？我見有藝人唔止捐款，仲用自己嘅方法撫慰災民嘅心情，有人留言，仲有人打電話慰問，呢件事唔係一般大眾可以做到，有願意咁做嘅藝人值得認同。
災難之下，所有人都係好渺小，但大家團結，各人都略盡綿力，集結力量總會帶嚟小小嘅影響。願死者安息，生者釋懷。