新銳導演林善與譚善揚(Antonio)聯合執導，並由後者編劇的新片《不赦之罪》，已於6月5日上映。早在2024年3月電影開拍的報道曝光後(劇組同年1月開鏡)，主角之一、飾演少年強姦犯陳梓樂的歐鎮灝(George)就注定成為焦點。
過去六年，佐治的演藝路可以說是從艱難中起步，由2019年在將軍澳邵氏影城出戰《全民造星II總決賽》，去到2021年與吳啟洋(Phoebus)和葉振弘(Marco)以男團「P1X3L」名義出道。外界總是對他抱有強烈質疑，認為做個「樣貌擔當」合格有餘，惟跳舞和唱歌的整體實力一般，能否讓人記住甚至喜歡，不表樂觀。
但觀眾眼睛是雪亮的，機會亦從來只留給有準備的人。踏入2023年，佐治的努力終於被看見，團綜《P1X3L 5G上台計劃》和劇集《那年盛夏我們綻放如花》接連推出，他的表現脫胎換骨，真正做到「讓作品說話」。而演出其實就是儲積分，連同上天賜予的際遇，往往就會得到換取更多機會的鑰匙。
所以當知道佐治即將「處男下海」涉足影壇，在《不赦之罪》擔正，並可以跟影帝黃秋生和劇后蘇玉華大演對手戲，雖說意料之內，但確實也有點驚喜，更多的是感動，畢竟作為忠實支持者和旁觀者，眼見「佐治」稚氣不再，在鏡頭面前愈見進步，更隱隱散發一種明日之星的潛質與光芒，實在由衷覺得「阿仔生性叔叔倍感安慰」。
我好奇，到底佐治是怎樣得到這次演出機會？來龍去脈原來頗為曲折。
且聽導演之一的林善接受專訪時怎樣回答：「呢個角色本身我係好想自己做，casting嘅時候，我哋見過好多唔同適合呢個角色年齡嘅年輕演員，但係個個都好似爭少少，好似有啲嘢唔係好啱咁樣，佢哋演係演到，但硬係唔係好似呢個阿樂，我自己本身都係一個演員，覺得好被呢個劇本吸引，因為佢(中選者)有得做一個好有挑戰性嘅角色，加埋我嗰陣已經知道係同黃秋生先生對戲，我當然係好想撲出嚟搶咗呢個機會，但呢個劇本係佢(Antonio)嘅心血結晶，佢一聽到我要自己做呢就腳都震，佢就好抗拒，好唔想我做，就即刻睇下有咩人可以取代，之後阿George就出現咗喇。」
在旁的Antonio解釋他與佐治的緣分如何出現：「嗰陣我係睇完《那年盛夏》，咁我覺得佢有個好有趣嘅特質呢，就係睇到佢唔覺得自己係偶像，嗰個係一個gut feeling(直覺)嚟㗎，我覺得佢係一個好認真嘅演員，同埋有好多面向……我哋碌佢IG係睇唔到(呢一面)，總之就係靚仔喎，係嗰啲美少女鍾意嘅idol啦，又白雪雪，我覺得佢點做強姦犯呢？但我好想試下，就俾一次機會佢casting啦。再加上其實有個神秘人物㗎，就係周祉君，同一時間佢突然同我提起：『不如試下阿George啊！』我覺得我咁諗，佢又咁諗，可能係有啲天意。」
何以周祉君會變成「佐」攻王？理所當然要問問本人。小望(周的別名)說之所以跟Antonio認識，源於他曾經參演對方在香港演藝學院電影電視學院的畢業短片《法蘭西博士》(譚善揚2020年畢業)，「嗰陣時我覺得，呢個編劇幾得意喎，我就成日喺轉機位啊，或者唔使我(演)嘅時候就係咁撩佢傾偈，發覺呢個人好有諗法，好有趣，我好希望繼續同佢會做朋友。」
轉眼幾年過去，來到2023年年初，某天小望突然想起Antonio：「嗰陣時係疫情嚟嘅，到疫情緊尾喇，我覺得好似冇咩搞，突然之間就想搵個……寫個proposal，諗住揼入去ViuTV希望開劇，就諗搵邊個人(合作)好呢，突然醒起Antonio，其實佢得意㗎喎，就約咗佢出嚟食飯。」結果Antonio答應與他的好兄弟胡天朗(《IT狗》編劇之一)幫手寫計劃書，奈何Antonio一早已落實要離開香港到異鄉當宣教士，為期大半年，當他回港之後沒多久，就要開始籌備《不赦之罪》了。
某夜小望相約Antonio和胡天朗吃飯敘舊，席間談到這齣新戲已鐵定由黃秋生與蘇玉華演出，反而阿樂一角尚未有定案，小望就提起佐治，「嗰陣時啱啱播完《那年盛夏》冇幾耐，我自己就其實唔係好睇晒，但喺我腦裏面就覺得George呢個人as一個演員嘅character好得意，好少有，佢有一種我會形容為unearthliness(超凡脫俗)……Tilda Swinton都係呢系，如果你(將George)加落去(秋生、阿蘇)，個畫面上好似幾得意喎，同埋你講緊一件咁離譜嘅事(強姦)，唔知點解我覺得個vibe好啱囉，(跟Antonio說)不如你試下搵下佢啦。」經過兩次試鏡後，佐治最終獲得演出阿樂的機會，開啟他的演藝事業新篇章。