我阿娘嗰個年代，有得去戲院睇戲已經好開心，家陣，唔止要地點方便、必須提供網上訂票服務，仲要求N咁多K嘅視覺享受，連小食都非常講究，如Fine dinning、中、日、韓餐應有盡有，之不過，唔同地區、品牌嘅戲院需要配合target audience推出嘅餐點都有所不同，而位於金鐘嘅AMC Pacific Place，當然係以識飲識食嘅OL或藍白領客人為主。
再會炭燒魷魚
AMC Pacific Place早前經過大裝修後，近日又有新搞作，就係同名廚張錦祥(Ricky)合作設計一系列新派歐陸菜，包括已推出嘅泰式冬蔭功墨魚粒(圖，$70)及意大利風乾火腿魚柳卷($70)，以及6月推出嘅匈牙利燉牛肉($80)、鮮茄香草西班牙黑毛豬肉($80)及日式香煎牛舌($80)。上星期老芬去咗試菜，特別鍾意泰式冬蔭功墨魚粒，據Ricky所講，呢道菜嘅設計啟發自上世紀嘅睇戲必吃小食「炭燒魷魚」。佢用冬蔭功香料浸大墨魚5個鐘，再慢煮1個鐘，食落酸酸辣辣，口感清新，而且細細件易於咀嚼，配埋戲院有售、略帶熱情果及檸檬味道嘅西班牙氣泡酒Cava，的確寫意。