同公司唔同命

COLLAR近日推出第二張大碟，粉絲大讚新專輯有齊多樣曲風，編排又照顧到成員聲線特點，仲專登去日本拍攝MV。專輯設計、附送內容同定價都被認為「抵玩」，可以話由宣傳到產品規劃亦令大家覺得團隊好有部署。今時今日呢個環境得到正評唔易，而且唔止令「領粉」滿意，連 MIRROR粉絲都話好羨慕，感嘆「同公司唔同命」。事實上，我相信MIRROR都難以複製COLLAR嘅效果，原因我認為分為客觀同主觀兩個方面：

客觀因素方面，係好現實嘅人數問題。MIRROR有12個成員，夾期做任何工作，本身比7個人嘅COLLAR困難好多。一個好嘅宣傳計劃，需要團隊所有人配合。好似COLLAR今次專輯宣傳，由社交媒體頭像更換、IG排版到媒體訪問，視覺形象都好一致，令fans感受到團隊有心經營團體品牌。相對COLLAR而言，MIRROR長期以個人發展為主，大部分人可以獨當一面，鏡仔將團嘅工作唔放首位都好易理解。所以，即使MIRROR有幾好嘅計劃，執行上都係會困難過COLLAR好多。

至於主觀因素方面，我一直認為MIRROR今時今日面對最大嘅挑戰，就係內耗，包括團隊同粉絲之間。正如Edan早前話「MIRROR最大嘅hater係隊友粉」，雖然話係講笑，但大家都知係事實。每次有新作品、訪問或任何宣布，都會引起唔同粉絲群組嘅反應：一邊開心，另一邊可能就憤怒；一邊滿足，另一邊又話唔公平。同一個團隊有咁多持份者之間嘅角力，可以想像，背後團隊做任何決定都有好多掣肘，往往為咗滿足/唔得罪人，就唔敢試新嘢。長遠嚟講，呢種氛圍會令成個團體失去突破，當然又會被fans批評「冇心做團」。粉絲分化同團隊內耗日積月累，即使MIRROR擁有公司最多嘅資源，都未必能夠真正發揮團體力量。

總結嚟講，放眼環球，女團嘅路本來冇男團咁易行。今次COLLAR同團隊表現獲得掌聲係值得高興，希望佢哋保持隊型，行出自己嘅康莊大道。