下月展開嘅「第41屆香港國際電影節」(HKIFF)，早前宣布開幕電影為大家都好期待嘅《春嬌救志明》，而閉幕電影就係九把刀自編自導新作《報告老師！怪怪怪怪物！》。
九把刀重出江湖
眾所周知，九把刀11年憑《那些年，我們一起追的女孩》打出名堂，此後已甚少擔任導演，人紅自然多workload，隨住多部小說被改編，由佢擔任編劇嘅台灣片亦愈來愈多，如《等一個人咖啡》及《樓下的房客》等。今次《怪》片，係九把刀繼《那》片後又一自編自導作品，唔同嘅係，劇本唔係改編自佢嘅小說，反而係佢嘅全新創作。有傳因為fans唔多喜歡《樓下的房客》電影同原著差太遠，於是，九把刀為免再有「原著」包袱，決定寫番個原創電影劇本。
好有《三五成群》feel
據講《怪》片耗資一億新台幣拍攝，故事講述資優生林書偉長期被同學欺負，尤其是班上嘅「風雲人物三人組」，於是女班導刻意安排4人一齊「關懷社區」，照顧一位獨居老人。點知班衰仔竟然計劃偷走老人家保險箱財物，無意間發現一隻食人怪。早前睇咗預告片，唔知係咪因為部戲牽涉校園欺凌，而班細路又聯群結黨行動，令我覺得好有《三五成群》feel；而咁啱，風雲三人組又各有特色，一個鍾意扮大佬，一個愛搞笑，一個係牆頭草，真係好難唔諗起18座大王㗎喎。
