香港人新開位於曼城Denton的茶餐廳——打躉。
在曼城愈來愈多香港人經營的食店，最近終於發現一間似樣的港式茶餐廳，皆因這裏竟然有「常餐」供應呀！在英國是很稀有的，我在曼城唐人街真係冇見過，這間新開的茶餐廳叫Denton Delights，中文名改得好，取其店舖位處地區Denton的發音，叫「打躉」。一聽舖頭名就知道是香港人經營，意思貼切又易記。
上星期相約了幾個街坊一齊去打躉，如果由巿中心揸車去Denton大約20分鐘，坐巴士則約35分鐘。來到店舖門口已有人等位，全店坐滿香港客，都是講廣東話，還錯覺以為自己身處香港，好不熱鬧，間中亦見一兩個本地客買外賣。一看餐牌，實在太多嘢想食，而且價錢唔貴，抵食！除了有最想食的常餐，還有碗仔翅、酸辣湯、牛腩麵、台式炸大雞排、滷水雞髀、土匪雞翼、雞蛋仔、格仔餅、西多士、豆沙鍋餅等等。之所以有這麼多選擇，原來老細Ryan之前在香港從事飲食業差不多30年，做過上海食店、茶餐廳、水吧，經驗豐富。
來到茶餐廳，當然要叫常餐啦！沙爹牛麵、火腿通、雪菜米，配煎蛋或炒蛋，加件牛油方包，再來一杯檸茶或奶茶，就是香港人最掛念的味道。我點了沙爹牛麵，牛肉大大塊好嫩滑，個沙爹汁又香又惹味，與煮得剛剛好的出前一丁，簡直是完美配搭，這個餐賣£6.5，在英國去邊度搵呀！我們還點了很多款食物分甘同味，推介必食碗仔翅，用料十足，加醋加麻油落胡椒粉，完全是香港的味道。其實還想試很多食物，例如台式炸大雞排、酥炸豬扒、豆沙鍋餅，但實在太飽，下次一定會再來打躉。
